Ad hoc divina providentia imperatores et reges terreni regni apicem conscendere permittit, ut servorum Dei de sua abundantia suppleant inopiam et sic per misericordiam quam impenderint, ęternam post temporalem mereantur percipere coronam. Hoc enim modo et nobis consulitur et ipsis, dum in altero nostra largitate eorum relevatur inopia, in altero ipsorum devota oratione ęterna nobis paratur corona. Iccirco {corr: Idcirco} ego Aldefonsus, Hyspanie imperator, comperta cenobii Cluniacensis tam celebri, tam probata, tam sancta religione, divino mox timore compunctus et amore, societatem fratrum ibidem Deo et sancto Petro militantium humiliter peto et dono Deo et ęcclesię pręfate beatorum apostolorum Petri et Pauli Cluniaci, et Petro abbati, omnique conventui abbatiam Sancti Facundi et Primitivi, quę sita est in Legionensi episcopatu, supra flumen quod dicitur Ceia, cum universis honoribus suis, quos possidet vel quos est possessura in ęternum, pro animę meę et patris mei Raimundi, comitis, matrisque meę Urrachę reginę, et avi mei regis Aldefonsi, et omnium parentum meorum redemptione, per consilium et prudentiam domni Stephani, abbatis supradicti monasterii, et Hugonis, camerarii. Tali autem pacto donum istud facio, ut abbas Cluniacensis quicumque ille sit, de congregatione sua quem voluerit abbatem in prefato monasterio ordinet, qui sub ejus et ęcclesię Cluniacensis obedientia permaneat, et in uno quoque anno quatuor marcas argenti Cluniaco pro censu reddat. Si quis autem ex heredibus meis, aut alius aliquis contra hanc donationem nostram venire temptaverit et pręsenti cartę obviare, cum his qui Dominum tradiderunt et crucifixerunt, in inferno perpetualiter ardeat, et totius hereditatis meę, mea imprecatione et Dei manu vindicante, exsors fiat. Factum est autem hoc testamentum era millesima centesima LXX, anno ab incarnatione Domini M. C. XXX. II., epacta XII, indictione X, VII idus septembris. Ut autem inviolabilis tam a me quam ab omnibus successoribus meis in perpetuum hęc mea teneatur donatio, hanc cartam fieri pręcepi, quam regia manu et auctoritate subterfirmavi et corroboravi, atque firmandam ęque principibus meis et fidelibus mandavi. Et hoc donum in manu domni Stephani, ejusdem monasterii abbatis, et Hugonis, Cluniacensis camerarii, peregi. Raimundus, archiepiscopus in Toleta, confirmat. Didagus, archiepiscopus in Compostella, confirmat. Aries, episcopus in Legione, confirmat. Petrus, episcopus in Palentia, confirmat. Robertus Asturicensis episcopus, confirmat. Infanta Santia, germana regis, confirmat. Rodrigus Gunzalvet, comes in Toleta, confirmat. Petrus, comes in Monte Forti, confirmat. Rodrigus Gomiz, comes, confirmat. Rodrigus, comes in Legione, confirmat. Belasco Moniet confirmat. Goter Pelagius confirmat. Petrus Pelagius confirmat. Goter Fernandus confirmat. Anaia Rodrigo confirmat. Ego rex Aldefonsus, cum uxore mea regina Berengaria, et Santia, mea germana, dono abbatiam Sancti Facundi et Primitivi cum suis honoribus Deo et sancto Petro Cluniaci et hanc cartam fieri jussi, quam propria confirmavi et corroboravi manu.